جمعیت علمائے اسلام (جے یو آئی) کے سربراہ مولانا فضل الرحمان نے امت مسلمہ کے اتحاد پر زور دیتے ہوئے کہا ہے کہ آج بھی امت ایک صف میں ہے، لیکن حکمران عوام کے جذبات کی ترجمانی نہیں کر رہے۔
مولانا فضل الرحمان نے غزہ میں اسرائیلی جارحیت کی مذمت کرتے ہوئے کہا کہ اسرائیل نے امن معاہدہ توڑ کر غزہ پر حملہ کیا ہے، جس کے نتیجے میں شیر خوار بچے زندگی اور موت کی کشمکش میں مبتلا ہیں۔ انہوں نے اسرائیلی وزیر اعظم نیتن یاہو کو جنگی مجرم قرار دیتے ہوئے عالمی عدالت انصاف سے ان کی گرفتاری کا مطالبہ کیا۔
انہوں نے مزید کہا کہ فلسطین میں نہ ادویات ہیں نہ کھانے پینے کی اشیاء، لیکن مسلمان حکمران خاموش ہیں۔ انہوں نے امت مسلمہ پر زور دیا کہ وہ اپنے حکمرانوں پر سیاسی دباؤ بڑھائیں تاکہ وہ امریکا اور مغرب کے سامنے جھکنے کی بجائے امت کے جذبات کی ترجمانی کریں۔
مولانا فضل الرحمان نے اعلان کیا کہ 10 اپریل کو اسلام آباد میں تمام مکاتب فکر کا کنونشن منعقد 
کیا جائے گا، جس میں مشترکہ حکمت عملی اور مؤقف اپنایا جائے گا، جبکہ 13 اپریل کو کراچی میں اسرائیل مردہ باد مظاہرہ ہوگا۔
